O Castelo Ramiro, unha fortaleza episcopal construída en Ourense a finais do século XII, será un dos eixos históricos sobre os que xirará a posta en escea  de Auria III, o espectáculo co que se inauguran este luns as Festas de Ourense 2011.
Nun intento de recuperar episodios pouco coñecidos da historia da cidade, o espectáculo recreará momentos épicos das revoltas irmandiñas e do poder eclesiástico e señorial, segundo sinala a Concellería de Cultura que dirixe a concelleira nacionalista Isabel Pérez.
O Castelo Ramiro é un dos expoñentes deste poder “de onde partían abusos e inxustizas”, segundo reza a sipnose do espectáculo, e  foi destruído no século XV, converténdose no primeiro castelo de Galicia derrubado nas revoltas irmandiñas, no ano 1467.
Pero a recreación non se limita ós momentos históricos, senón que recorre á mitoloxía e ás lendas populares para construír un gran espectáculo.

Na posta en escea, organizada por “Boneca Lareta” participan máis de oitenta persoas, “o setenta por cento ourensáns”, segundo sinala o seu director creativo Aitor Rei, quen destaca a “calidade profesional deste equipo de mozos creativos e emprendedores”, desde actores, bailaríns, deseñadores, músicos e un longo etcétera de persoal implicado na producción.
Trátase, segundo Aitor Rei, “da producción teatral e circense máis grande de Galicia, nun mesmo espectáculo”.
O director creativo explica que é o resultado de máis de catro meses de preparación, e anima a tódolos ourensáns a participar porque “se van sorprender coa variedade e coa vistosidade do espectáculo”, que inclúe tirolinas e “moitas sorpresas” que non quere adiantar para manter a expectación.

Terceira parte

O espectáculo deste ano supón “a terceira parte dunha viaxe pola cidade de Ourense a través dos tempos”. Segundo sinala Aitor Rei, “o espírito é o mesmo, pero o espectáculo é completamente distinto ó das edicións anteriores”.
O obxectivo é trasladar o espectáculo á rúa para “converter a cidade nun escenario” e “para facilitar a participación de tódolos cidadáns”, segundo sinala a concelleira Isabel Pérez. “Non vai haber un pregoeiro ó uso -engade- porque a preoeira é a propia cidade de Ourense e a súa xente”.

O espectáculo, que marca o arranque oficial das Festas Mayores de Ourense 2011, terá lugar na Praza Maior da cidade a partires das 21:30 Hs.