Un total de 550 nais, pais e educadores participaron nas actividades desenvolvidas pola Concellería de Sanidade do Concello de Ourense dentro do Programa de Educación e Prevención Familiar correspondente ó curso 2010/2011.
O alcalde en funcións, Francisco Rodríguez, e a concelleira de Sanidade en funcións, Marga Martín, clasuraron este xoves estas actividades nun acto no que se procedeu á entrega de diplomas ós participantes no programa “Escola de Nais e Pais” e no III Curso de Educación Familiar.

“O programa pretende apoiar ás familias e educadores no papel fundamental que desempeñan no desenvolvemento integral dos nenos, axudándoos no proceso evolutivo, educativo e madurativo dos cativos, tentando fortalecer o seu papel referencial, potenciar a comunicación e as habilidades sociais”, sinala o departamento de Marga Martín.
O programa incluíu diferentes actividades e servizos que se desenvolveron dende outubro de 2010 ata xuño de 2011, como unhas “Xornadas de Familia: Adolescencia, familia e sociedade”, nas que participaron 285 persoas; o Programa Escola de Nais e Pais (105 persoas); o “III Curso de Educación Familiar: A familia e a sociedade” (60 persoas); e o SmaFF, Servizo Municipal de apoio a Familias con Fillos, (105 persoas).

Dende o Concello recórdase, precisamente, que o Servizo Municipal de Apoio ás Familias con Fillos, posto en marcha en xaneiro de 2010, vén de recibir un recoñecemento a nivel toda España ó obter o primeiro premio da IV Convocatoria de Boas Prácticas en Drogodependencias que convoca a Federación Española de Municipios e Provincias (FEMP) na categoría de pevención familiar.
O SMAFF é un servicio de atención personalizada cuxo obxectivo prioritario é informar, mediar, asesorar e dar apoio ás  familias e profesionais da educación de Ourense que se atopen ante situacións puntuais difíciles, e de relevancia suficiente como para afectar ou poder afectar ao benestar ou equilibrio psicosocial do grupo ao que pertenzan.