O escultor Manolo Paz presentou este xoves no Centro Cultural da Deputación o catálogo da exposición “Catro estacións” que ten neste  recinto cultural ourensán, e no que se recolle ademais da obra desta mostra gran parte do seu traballo ao longo dos últimos 30 anos.
Este traballo de catalogación foi valorado de maneira especial polo director do centro, Francisco González, que considera que “a catalogación desta obra, incluso algunha dela nunca exposta, resulta un traballo cultural de especial importancia e complementario ao propio proceso expositivo”.

O escultor agradeceu en todo momento “a colaboración e disposición da Deputación” e referiuse “á profesionalidade” coa que foi tratado tanto el como a súa obra.
Asemade, Manolo Paz valorou moi positivamente o resultado plástico e o contido do catálogo que recolle esta exposición que continúa ocupando espazos dun dos principais centros expositivos desta cidade.