O deporte entendido como piar do benestar ao tempo que “un dereito social”. Así explicou o concelleiro de Deportes do Concello de Ourense, número 3 da candidatura do BNG ás Municipais do vindeiro 22 de maio, Fernando Varela, a concepción que o Bloque Nacionalista Galego sigue a ter do municipalismo no eido deportivo.
Fernando Varela, ao que acompañou no acto de presentación do Programa do BNG en materia deportiva o xerente do Consello Municipal de Deportes, Manuel Rodríguez Mosquera, así como a cabeza de lista do BNG e candidata a alcaldía, Isabel Pérez, subliñou que “o deporte debe estar dirixido a todas e todos, independentemente da idade, xénero, descapacidades físicas, psíquicas ou sensoriales”.
Algo que cadra co que sostén a candidata á alcaldía, Isabel Pérez, que volveu a sinalar que o BNG “facemos unha cidade máis xusta, na que as persoas sexan o centro da acción política”.

En materia de deporte e lecer, o programa electoral do BNG fala de promover o deporte recreativo como factor de lecer para mellorar o estado físico, organizando competicións de carácter popular ou xornadas de deporte na rúa; a creación de circuitos de carreiras populares polos barrios ou de seguir potenciando o achegamento da cidadanía ás instalacións deportivas e aos eventos deportivos cunha política de prezos adecuada.
No abano amplo adicado no programa a eventos e instalacións deportivas, o programa do BNG propón a construción do complexo deportivo de Mariñamansa, cun polideportivo con adicación preferente á ximnasia e máis unha piscina, e tamén ampliar a rede de espazos deportivos, mellorando a oferta en Oira, As Eiroás, Velle, O Couto, A Farixa e Santa Cruz de Arrabaldo.

Fernando Varela sinalou que tamén no deporte se promoverá a coordinación e o crecemento do tecido asociativo deportivo, ao tempo que o desenvolvemento do Consello Municipal de Deportes, CMD, constituíndo unha Comisión Consultiva do Consello Reitor do CMD como órgano de participación de particulares e institucións vinculadas ao CMD.
En materia de deporte escolar, anúnciase a creación de diferentes escolas deportivas, ao tempo que, anunciou Fernando Varela, “promoverase a práctica deportiva nos barrios a través da optimización das infraestruturas existentes, e a creación de novos espazos polideportivos”.