A Xunta de Goberno Local do Concello de Ourense aprobou na súa xuntanza semanal deste xoves, o expediente de contratación e prego de cláusulas para adxudicar mediante procedemento aberto as obras de remodelación do Parque dos Pulmóns, sito na Praza de San Rosendo. O proxecto suporá un investimento de 354.000 euros.
Explica o Concello de Ourense, que coa actuación proxectada dotarase ao recinto dunha completa área de xogos infantís con diversos elementos para nenos combinándoa coa restauración e mantemento das actuais zonas verdes.
Tamén se renovará o pavimento  da actual zona de beirarrúas que separa ambos recintos, eliminando o seto interior para favorecer a mobilidade, aproveitando as actuais aliñacións do arborado para sombra.

O Parque dos Pulmóns é un espacio público municipal de 2.221 metros cadrados de superficie que fora acondicionado no seu día pola promotora que construíu o edificio que o bordea, creando dúas zonas verdes con forma de pulmón separadas por unha rúa onde a zona reservada a xogos infantís é moi reducida. A zona experimentou un notable crecemento urbanístico, sendo este espacio moi utilizado por nenos e mozos.  
A intervención inclúe a instalación de contenedores soterrados para recollida de lixo, con 5 contenedores metálicos de 3.200 litros (2 para materia orgánica, 1 para plásticos, 1 para papel e 1 para vidro).
No paso de peóns que enlaza ambos pulmóns ubicarase un redutor de velocidade. Instalaranse novos bancos, papeleiras e diferentes xogos infantís (tobogán, balancíns, columpios, un arriero, conxunto de torres, carrusel, exercicio con rede, entre outros).

Adxudicación provisional da humanización da rúa Río Mao na Ponte

Tamén a Xunta de Goberno Local deste xoves procedeu a adxudicar de xeito provisional as obras de acondicionamento de espazos urbáns na rúa Río Mao, no barrio da Ponte, que executará a Concellería de Infraestruturas. O proxecto, orientado a humanización deste vial buscando fomentar a actividade comercial na rúa, comprende intervencións en beirarrúas e calzadas, renovación de mobiliario urbán, alumeado e vexetación, así como renovación das infraestruturas soterradas de abastecemento e saneamento.
A acción conta cun orzamento de algo máis de 692.000 euros.

Con esta intervención a Concellería de Infraestruturas que dirixe o edil nacionalista Manuel Herminio Iglesias di ampliar o programa de humanizacións na zona Ponte-21, onde xa se desenvolveron actuacións nas rúas Río Bibei, Avia, Sil, Arenteiro e Támega e onde se ven de presentar outra actuación na rúa Alejandro Pedrosa, lembra esta Concellería.