O secretario xeral da Emigración da Xunta de Galicia, Santiago Camba, será o encargado de presidir os actos do Encontro da Inmigración correspondente á súa edición deste ano, que nesta ocasión ten como lugar de acollida o Peirao de Transatlánticos da Estación Marítima de Vigo e que se celebrará este sábado, 12 de marzo.
As actividades darán comezo á cinco da tarde coa inauguración da exposición “Galicia somos todos”, unha mostra fotográfica que reflicte a testemuña de inmigrantes radicados en Galicia. Trátase dunha ollada ampla e plural sobre a poliédrica realidade da inmigración que nos rodea, fuxindo dos tópicos e facendo boa a máxima da nixeriana Joan John, unha das protagonistas da mostra: “A inmigración axuda a construír sociedades máis tolerantes”.

Así, na mostra convértense en embaixadores desa mensaxe un transportista arxentino, un músico angolano, unha comerciante venezolana, unha cociñeira romanesa, un guía e un hostaleiro brasileiros, unha estudante marroquí, un carpinteiro, un maquinista e unha veterinaria uruguaios, un escritor inglés, un camareiro cubano, outro polaco, outra máis paraguaia e máis outra mozambicana, un músico ruso e outra húngara, un mecánico islandés, un enxeñeiro escocés, unha esteticista nixeriana, un deseñador mexicano, e unha economista xaponesa.
Aínda que, ao final, amósase que a procedencia de cada quen é o menos importante: “Un é de onde está vivindo”, segundo testemuña o angolano Manuel Lopes.

Trala inauguración da mostra, terán lugar no mesmo enclave as actuacións musicais do grupo andino Macchu Picchu e do caboverdiano Batuko Tabanca, así como do cantante galego Carlos Bau. As actividades teñen sido organizadas pola Secretaría Xeral coa colaboración do Porto de Vigo, a Fundación homónima, e a Deputación Provincial de Pontevedra.

“Non é casualidade que se teña escollido Vigo como punto do Encontro deste ano, toda vez que, ademais de ser a cidade máis poboada da Galicia territorial, é a que máis número e maior porcentaxe de inmigrantes acolle”, sinala o depatamento de Santiago Camba.
Recentemente, a Secretaría ten organizado actividades similares noutros puntos xeográficos de relevancia na recepción de estranxeiros, como o porto lugués de Burela.