Os máis de 1.400 ourensáns que participan actualmente nos cursos e obradoiros da Universidade Popular poderán desfrutar dende este xoves, 23 de marzo, de novas instalacións á súa disposición no barrio das Lagoas. Trátase de dúas novas aulas sitas na rúa Vasco da Ponte nº 1, que foron inauguradas polo alcalde de Ourense, Francisco Rodríguez, e a concelleira de Educación, Ana Garrido.
A actuación foi financiada con cargo ós Orzamentos municipais, cun investimento de 215.909 euros.

Cumpridos xa 16 anos da súa posta en marcha, a Universidade Popular continúa acadando récords de participación, con 1.405 matrículas en 70 actividades formativas programadas.
Este curso a traxectoria da iniciativa foi recoñecida a nivel nacional coa concesión do Premio Miguel Hernández convocado polo Ministerio de Educación, salientou a concelleira de Educación, ana Garrido.
Os programas están dirixidos a adultos ourensáns a partir de 16 anos, establecendo prioridade no referido ós sectores de poboación máis desfavorecidos socialmente, e que por razóns culturais, educativas ou económicas teñen menos medios para acceder con igualdade de oportunidades á educación e á cultura.

Cunha metodoloxía activa, participativa, socializadora, flexible, interrelacional e lúdica, as actividades pretenden motivar ós sectores sociais menos activos estimulando o coñecemento, potenciar a formación básica da poboación adulta e garantir que poidan aumentar e actualizar os seus coñecementos, á vez que se dinamiza a vida cultural da cidade. Asimesmo, a participación nos diversos obradoiros e cursos favorece o desenvolvemento comunitario, desenvolve a madurez persoal mediante a adquisición de capacidades, e mesmo proporciona formación para o emprego, favorecendo a adquisición de habilidades e destrezas aplicables a nivel profesional.