En “absoluto bo clima” se celebrou a xuntanza que na mañá deste martes celebraron no Pazo Provincial o presidente da Deputación, José Luis Baltar, e o concelleiro de Deportes, José Fernando Varela, ao que acompañou o Xerente do Consello Municipal de Deportes, Manuel Rodríguez Mosquera.
A xuntanza chegou despois das críticas ao Concello e ao Consello Municipal de Deportes feitas polo presidente do Ponte Ourense, Plácido Díaz, nas que meteu por medio á institución provincial ao asegurar que Baltar Pumar lle concedía o clube que preside o que o Concello da capital lle negaba.
Extremos tamén revisados por ámbalas dúas partes na xuntanza deste martes.

No transcurso desta reunión, tanto o presidente da Deputación como o titular de Deportes do Concello coinciden en que se acadou colaboración para a mellora de infraestruturas “claves” para a cidade, como son o compleo deportivo de Oira, Velle e as actuacións previstas en Mariñamansa.
O concelleiro do BNG subliñou que “é importante que as administracións públicas sexan quen de sumar esforzos polo ben dos seus cidadáns, é un exercicio de responsabilidade política que neste caso actúa sobre unha serie de infraestruturas que os propios ourensáns demandan”, dixo Fernando Varela ao remate da Xuntanza.
No caso do complexo deportivo de Oira, ambas partes acordaron manter unha reunión coa directiva da Ponte S.A.D. na que se solicitará unha relación das demandas que serán valoradas económicamente, de cara a acometer conxuntamente un proxecto de actuación na zona.  O acordo formalizaráse nun convenio entre a Deputación e a Concellería de Deportes.

En Velle, as actuacións de mellora nas infraestruturas deportivas repartíronse entre ambas administracións: a Deputación acometerá a construcción dun campo de herba sintética na zona mentres que o Concello asumirá os custes de obras complementarias para a optimización do área.

Finalmente, na previsión de infraestruturas deportivas en Mariñamansa, ambas institucións aceptaron e lamentaron a situación xurídica na que se atopa a zona, que impide a presente concreción e posta en marcha de novas iniciativas.