Coa organización de dous concertos nesta primeira edición que terán lugar este xoves, 5 de agosto, e o venres, día 6, no Claustro Barroco do Mosteiro de San Rosendo, o Concello de Celanova inicia este ano un programa anual de concertos que persegue o obxectivo de dar a coñecer cada ano a representantes da música tradicional das distintas comunidades autónomas do Estado, así como de Portugal ou de distintos países de Iberoamérica.
Nesta primeira edición este xoves actuará no Claustro Barroco a cantante asturiana Anabel Santiago, mentres que o próximo venres farao o zanfonista vallisoletano Germán Díaz.

Estes concertos están organizados en colaboración co Centro da Música Popular “Central Folque” e contan tamén coa colaboración económica da Consellería de Cultura e Turismo.
O obxectivo do Concello de Celanova é “consolidar un ciclo de concertos anuais que conxugue o patrimonio monumental do Claustro Barroco co patrimonio musical da Península Ibérica, poñendo así en marcha unha iniciativa novidosa e pioneira dentro da programación estival galega”, sinálase dende o Concello que dirixe como alcalde Antonio Mouriño.