A titular da Secretaría Xeral de Turismo da Xunta de Galicia e o presidente do Consorcio de Turismo da Ribeira Sacra asinaron este martes en Santiago de Compostela un convenio para a xestión de actividades de promoción, dinamización e fomento da riqueza e do turismo da Ribeira Sacra.
A Ribeira Sacra está integrada por un total de vinte concellos, dos que oito están na provincia de Ourense, que son A Peroxa, Nogueira de Ramuín, Esgos, Xunqueira de Espadañedo, Montederramo, Parada de Sil, A Teixeira e Castro Caldelas.
Entre as accións máis relevantes, salientouse a campaña de promoción turística “Ribeira Sacra, onde nacen os sentidos”. Ademais tamén se aludiu á importancia que supón dar continuidade ao viñobús destinado a promocionar a Denominación de Orixe Ribeira Sacra.
A terceira acción de importancia radica na finalización das obras do centro de recepción de visitantes, situado no municipio lucense de Sober. O orzamento total do convenio acada os 185.937 euros, dos que a Secretaría Xeral para o Turismo achega un total de 149.000 euros.
Carmen Pardo reparou na “orixinalidade coa que inicia a campaña de promoción turística da Ribeira Sacra deste ano”, con accións como a baseada no autobús turístico “Ribeira Sacra, onde nacen os sentidos”, que parte da capital galega. “Trátase de artellar propostas dende unha perspectiva revitalizadora, experiencial, motivadora e con afán de continuidade, que sexan quen de incrementar os fluxos turísticos e de dar a coñecer dunha maneira didáctica e amena a oferta turística global da Ribeira Sacra”, asegurou a secretaria xeral durante a súa intervención. |
|