O director Xeral de Emprego do Concello de Ourense, Jose Angel Vázquez Barquero, salienta a importancia do III Encontro de Emprendedores Eduardo Barreiros, xa que “a cultura emprendedora é unha das saídas para moitos desempregados”, circunstancia á que se engade a vontade expresa do Concello de “coordinar e potenciar todas as accións relacionadas co mundo emprendedor” en tódolos ámbitos do emprendemento.
Unha das novidades do III Encontro de Emprendedores, refire Vázquez Barquero, será a constitución da Rede internacional de cooperación para o emprendemento, que terá lugar nas xornadas do venres e o sábado na CEO e no Concello de Ourense, e que ten como obxectivo específico a creación dunha estructura transnacional de cooperación “orientada á promoción da actividade emprendedora e a internacionalización das empresas locais”.
Vazquez Barquero subliña, ademais, a importancia da posta en marcha de convenios con distintas empresas “a través dos irmandamentos que existen” contando sempre coa colaboración dos empresarios galegos no exterior.
Foro da Creatividade e a Innovación
A semana de actividades organizadas polo Concello para fomentar a cultura emprendedora comezará o martes día 22 a partires das 10 da maña.
O Liceo acollerá a celebración do Foro da Creatividade coa presentación a cargo de Luis M. Delgado, subdirector xeral de Modernización e Promoción da Investigación Universitaria do Ministerio de Educación. A continuación intervirá José Mª Martín Moreno, profesor de Análises económicas da Universidade de Vigo que abrirá o debate sobre a situación actual e as perspectivas cara o futuro dos emprendedores.
O programa de actividades continuará coa celebración da III xuntanza do Consello Consultivo de Empresarios e Profesionais Ourensáns no Exterior, que terá lugar o venres día 25 a partires das 10 da mañá no Liceo de Ourense, acto tralo que se procederá á entrega do premio do concurso convocado polo Concello que distinguirá á Mellor Iniciativa Emprendedora desenvolvida na cidade. |