A Secretaría Xeral da Emigración da Xunta de Galicia xa seleccionou aos 241 participantes no programa Reencontros na Casa que viaxarán a Galicia nas vindeiras semanas para visitar a súa terra de orixe e reencontrarse coas súas familias. A chegada destes participantes será o día 20 deste mes ao aeroporto de Santiago de Compostela.
Este programa está destinado a emigrantes galegos, maiores de 55 anos, que levan moito tempo sen poder vir a Galicia. O obxectivo de Reencontros na Casa é promover o contacto dos galegos residentes no exterior coa súa terra e cos seus familiares.
A Secretaría Xeral da Emigración publicou no Diario Oficial de Galicia a resolución de convocatoria para este programa ao que se presentaron un total de 376 solicitudes para 241 prazas. De todas estas solicitudes resultaron seleccionados 114 procedentes de Arxentina, 90 de Uruguai, 18 de Brasil, 12 de Cuba e 7 de Venezuela, axudándolle, desde a Secretaría Xeral da Emigración, a costear o custe da pasaxe de avión, entre un 60% e un 80%, dependendo do país desde o que viaxen.
Cabe subliñar que os beneficiarios poden viaxar cos seus cónxuxes. Neste caso son 55 os matrimonios que viaxan ambos os dous a Galicia para compartir coas súas familias a súa estadía ata un máximo de tres meses. |