Este mércores, día 5, 300 escolares da cidade terán a oportunidade de desfrutar dun “novidoso espectáculo” organizado pola Concellería de Educación, segundo sinala o propio departamento de Ana Garrido. Trátase dun concerto didáctico ofrecido pola Real Filharmonía de Galicia, que forma parte do programa “Música na Escola”, e está dirixido a alumnos de 2º, 3º e 4º de ESO de nove centros de ensino da cidade.
Mediante esta actividade, que terá lugar a partir das 12 do mediodía, a Concellería de Educación pretende fomentar entre os escolares o gusto pola música clásica e os concertos e aumentar o seu coñecemento neste eido, así como contaxiar ós alumnos o espíritu e o humor pedagóxico do narrador, Igor Stravinsky, mediante a participación do alumnado nas actividades lúdicas propostas.
Neste concerto, a Real Filharmonía de Galicia interpretará a obra Pulcinella, con dúas frautas, frautín, dous oboes, dous fagotes, dúas trompetas, dúas trompas, trombón, cordas e quinteto solista de cordas.
Os 300 escolares que teñen previsto asistir son alumnos do IES Lagoas, IES A Carballeira, IES O Couto, IES Xesús Ferro Couselo, Colexio La Purísima, Colexio Divino Maestro, IES Xulio Prieto Nespereira, Colexio Divina Pastora e IES Portovello, os nove desta cidade. |
|