O delegado Territorial da Xunta en Ourense, Rogelio Martínez, presidiu este venres a firma dos convenios para a dotación de albergues provisionais en sete concellos da provincia de Ourense, e que permitirán acondicionar varias instalacións así como habilitar 313 prazas máis de aloxamento para peregrinos. En total, a S.A. de Xestión do Plan Xacobeo destinou 183.489 euros a estes convenios que afectan aos municipios de A Gudiña, A Mezquita, Castrelo do Val, Riós, Vilar de Barrio, Xunqueira de Ambía e Xinzo de Limia polos que discorre a Vía da Prata.

No caso de A Gudiña, a Sociedade de Xestión do Plan Xacobeo destinará a este Concello 46.809 euros para o acondicionamento dunha antiga escola, ademais da dotación de mobiliario, para que funcione como albergue temporal e habilitar así 32 camas máis para peregrinos.
O concello de Riós contará, pola súa banda, con 13.050 euros para a habilitación da planta baixa do Centro de Interpretación da Castaña para que funcione como albergue provisional, e outros 14.959 euros para o mobiliario o que permitirá crear 36 prazas de aloxamento.
O de Xunqueira de Ambía contará con 38 prazas máis de aloxamento para peregrinos, para o que acondicionará o albergue de A Abeleda cos 14.786 euros que recibirá da S.A. de Xestión do Plan Xacobeo.
Pola súa banda, o municipio de Xinzo de Limia contará con 18.885 euros para a adquisición de 100 colchonetas e acondicionamento do pavillón municipal como albergue temporal.

Asemade, o convenio firmando este venres co Inorde recolle o investimento de 75.000 euros que fará a Sociedade de Xestión do Plan Xacobeo para dotar de mobiliario ás estacións de tren de Vilavella, no concello de A Mezquita,  Campobecerros, no de Castrelo de Val, e a de Barrio en Vilar de Barrio, e que funcionarán como albergues temporais. Estas tres estacións representarán un aporte ao Camiño Mozárabe de 107 prazas de aloxamento.