O Concello de Ourense convoca un concurso que premiará con 6.000 euros a mellor iniciativa empresarial que se desenvolva na cidade no presente ano 2010, iniciativa que se inscribe no programa de fomento da cultura emprendedora. A Xunta de Goberno Local aprobou ese martes as bases do premio, que ten como obxectivo “recoñecer a iniciativa, orixinalidade e innovación dun proxecto empresarial que se desenvolva en Ourense, así como fomentar a creación de empresas sobre a base das oportunidades emerxentes no municipio”.
O Concello sinala que este certame petende propiciar o xurdimento de proxectos empresariais innovadores na cidade e contribuir ó desenvolvemento do espíritu emprendedor. O concurso desenvolverase no marco do Encontro de Emprendedores “Eduardo Barreiros”, que organiza o Concello ourensán no mes de xuño.

As bases establecen que poderán concurrir aos premios tódolos emprendedores que presenten un proxecto empresarial que se materialice antes do día 31 de decembro de 2010, e cuxa actividade principal se desenvolva no Concello de Ourense. Os interesados deberán presentar a súa proposta no Concello, achegando solicitude de participación, segundo o modelo oficial, fotocopia do DNI/NIE do solicitante e dos socios, e definición da idea empresarial/Plan de Empresa.
O prazo de presentación será de 2 meses naturais dende a publicación da convocatoria no taboleiro de anuncios do Concello.

Os proxectos presentados valoraranse seguindo un criterio de baremación cuantificado ata 80 puntos, que se distribuirán en 4 conceptos: caracter innovador (ata 20 puntos); viabilidade técnica e económica (ata 20 puntos); creación de emprego, a razón de 5 puntos por posto de traballo creado, ata un máximo de 20; e utilización de recursos endóxenos do Concello de Ourense (ata 20 puntos).
O xurado estará composto por representante da Confederación Empresarial de Ourense, Universidade de Vigo, Consello Consultivo de Empresarios e Profesionais Ourensáns no Exterior o director xeral de Emprego e Promoción Económica do Concello e o concelleiro de Economía, Facenda, Emprego e Promoción Económica do Concello.

Os emprendedores que concurran ao concurso terán que expoñer e defender o seu proxecto ante o xurado nun acto público a celebrar no marco do III Encontro de Emprendedores “Eduardo Barreiros”, e a entrega dos premios será tamén no marco deste actividade.