O secretario xeral da Emigración, Santiago Camba, visita estes días á colectividade en La Habana na República de Cuba, onde residen actualmente 14.157 galegos, segundo datos do CERA a 1 de outubro deste ano.
Ao longo da súa estadía, o secretario xeral terá ocasión de encontrarse coas xuntas directivas e percorrer as intalacións de 49 sociedades galegas, así como de xuntarse cos coordinadores provinciais que colaboran na illa caribeña con moitos dos programas de atención social levados a cabo pola Xunta de Galicia. Tal é o caso das axudas económicas individuais, polas que 5.643 emigrados galegos recibiron prestacións económicas directas, un 52,8% máis que no 2008, segundo datos da secretaria xeral de Emigración.
Acerca das entidades visitadas Camba destacou a “súa singular traxectoria histórica e o interese desas comunidades de manter vínculos actuais de unión e solidariedade entre os galegos e os seus descendentes e á súa contribución ó mantemento da presenza de Galicia no país”.
Así mesmo, durante a súa primeira xornada na illa o responsable de Emigración e mailo xerente da Fundación Galicia Emigración, Xosé Manuel Castelao Bragaña, supervisaron na sociedade artística cultural Rosalía de Castro o programa de axuda das javas da Secretaría Xeral da Emigración, grazas ás que neste 2009 uns 700 emigrados galegos en Cuba- na maioría dos casos de avanzada idade- veranse beneficiados de javas ou bolsas de produtos de primeira necesidade.
|
|