Este xoves tivo lugar no Salón de Plenos da Deputación de Ourense o acto de clausura do Programa de Integración Laboral de persoas con síndrome de Down, iniciativa de formación e emprego que se enmarca no proxeto “Innova Ourense”, e acto que contou coa presencia do presidente da Deputación, José Luis Baltar, da vicepresidenta da Asociación Down de Ourense, Mara Prieto, e así como representantes das empresas e entidades colaboradoras que acolleron aos xóvenes na fase de inserción laboral do programa.
José Luis Baltar agradeceu a implicación da sociedade civil neste proxecto “porque todas as institucións e empresas que participaron nesta iniciativa amosaron o mellor delas a través da manifestación da súa responsabilidade social”. O titular da institución provincial engadiu que o “obxectivo prioritario” deste proxecto foi “ darlles a oportunidade a este mozos e mozas de experimentar a sensación e a responsabilidade diaria de estar nun posto de traballo. Isto é así porque os programas de políticas activas da Deputación de Ourense teñen que ofertar oportunidades para todos os cidadáns”.
Baltar agradeceu aos pais e ás familias dos xóvenes o seu traballo e anunciou que no primeiro trimestre do próximo ano, “se a Asociación Down o estima oportuno, poñerase en marcha unha nova actuación de carácter laboral, porque somos conscientes de que queda moito camiño por percorrer neste ámbito e queremos percorrelo xunto con vós”.
Pola súa banda, a vicepresidenta de Down Ourense, Mara Prieto, agradeceu ao presidente da Deputación o apoio constante e decidido da institución provincial e animou a todas as empresas, organismos e medios de comunicación a seguir apoiando a estes mozos e mozas no seu camiño de integración na sociedade, a través do eido laboral.
Itinerario formativo
O programa desenvolvido consistiu nun itinerario formativo denominado “Auxiliar de atención ó público en entidades públicas e privadas”, que tivo unha fase teórica e outra práctica, cada unha de dous meses de duración. Esta formación desenvolveuse entre abril e xullo do presente ano durante catro días á semana.
Dos 140 programas que se desenvolven en toda España cofinanciados polo Fondo Social Europeo a través do eixo 2 do Programa Operativo de Adaptabilidade e Emprego, o Plan Innova da Deputación de Ourense é o único que contempla unha actuación singular adaptada ás especiais características do colectivo Down.
Neste senso, no marco deste convenio, a Deputación de Ourense elaborou un programa formativo específico adaptado ás necesidades do colectivo Down, e puxo a disposición do grupo en formación e dos docentes participantes os medios técnicos e físicos necesarios para o correcto desenvolvemento e seguimento da formación.
Asi mesmo, a institución provincial seleccionou a formadores para a impartición do programa formativo, poñendo especial atención neste colectivo, asumindo os custes derivados de dita formación. En concepto de beca, a Deputación abonou mensualmente a cada alumno 395,43 €, que é a cantidade máxima que o Fondo Social Europeo permite abonar a persoas en formación. |
|