O Concello de Ourense ven de adxudicar o suministro de Material de Oficina, Papelería e Consumibles un 17% por debaixo do que estaba previsto.
O papel suministrado (600.000 follas/ano) deberá cumprir a norma TCF (Totally Chlorine-Free), o que supón que o total de fibras que compoñen o papel están branqueadas con compostos libres de cloro, medida máis restrictiva que a ECF (Elemental Chlorine-Free), coa que se producen dioxinas contaminantes. Na mesma liña, unha parte do papel será reciclado, cumprindo coa recomendación do Consello 81/972/CEE.
Ademais, o papel contratado ten a certificación forestal PEFC, concedida polo Consello de Certificación Forestal Paneuropea, dentro do “Programme for the Endorsement of Forest Certification”, unha organización sen ánimo de lucro, independente e non gubernamental, que dende 1.999 promove e supervisa a xestión sostible dos bosques dos que se extrae a madeira, para producir pasta de papel, basada nos criterios e indicadores emanados das Conferencias Interministeriais de Helsinki (1993) e Lisboa (1998) para a protección dos bosques de Europa.
“O Concello aposta, deste xeito, pola aplicación dunha rigurosa política medioambiental e de apoio á sostenibilidade no que atañe ós seus suministros, que non está en absoluto xeneralizada”, sinala o Goberno de Francisco Rodríguez. |