A Xunta de Goberno Local do Concello de Ourense adxudicou na súa xuntanza deste xoves as obras de canalización de augas pluviais e humanización da Praza de Rairo, cun orzamento de 316.031,05 euros, que serán realizadas pola empresa TRAIMA S.L. Trátase dunha vella demanda veciñal, expresada ao alcalde en varias ocasións polos veciños, e que agora o Concello de Ourense acomete definitivamente.
As obras teñen como finalidade afrontar a canalización que permita encauzar e transportar as augas pluviais procedentes das obras de drenaxe OD-1 da nova estrada de conexión da Nacional 525 coa OU 536, no tramo comprendido entre A Granxa e Rairo, e se completan coa humanización dun espacio público nesta última localidade.
Básicamente, o proxecto plantexa a construcción dun novo colector, independente do saneamento actualmente existente, que conduza as augas pluviais ata o regato máis cercano (Regueiro de Zaín), situado a unha distancia de aproximadamente un kilómetro. O colector discurrirá a través do pobo, primeiro pola rúa do Souto ata a estrada CV-401, que atravesará e continuará pola pista asfaltada que conduce ó núcleo de Canavelar, cruzando a vía do ferrocarril, ata chegar ó regueiro de Zaín.
O proxecto contempla tamén a humanización da Praza de Rairo, que será dotada dun novo pavimento, que será de taco de granito nas zonas de viais e beirarrúas, e de lousas de granito no interior da praza. A actuación inclúe tamén a construcción de novas escaleiras, varanda, marquesina e iluminación, así como o soterramento dos colectores de lixo.
Melloras do saneamento en 5 núcleos rurais
Na mesma sesión, a Xunta Local acordou destinar un investimento de 150.000 euros á execución de obras de ampliación das redes de saneamento en cinco núcleos rurais do termo municipal. O programa de actuacións, que desenvolverá a Concellería de Medio Ambiente, permitirá mellorar este servicio nos núcleos de Abeleda, cun investimento de 13.710,82 euros, Cabeanca ó que se destinarán 24.720,02, Ceboliño, con 40.866,08, Palmés, con 29.700 e Pereiro, con 41.003,08. As obras serán realizadas no presente ano 2009.
Convenio para obras de infraestructura rural e proxecto do Campo da Feira
Pola súa banda, a área de infraestructuras levou á Xunta de Goberno o convenio de cooperación entre a Consellería do Medio Rural da Xunta de Galicia e o Concello de Ourense en relación coa execución das obras de infraestrutura rural. O documento contempla o acondicionamento do camiño de Vilar das tres a Vilar Paradela ; Camiño da Rega; camiños dos Santos e da Cima e a Borraxeira (Mende), así como o afirmado do camiño da Aviñoá (Vilar)
Así mesmo, a Xunta de Goberno aprobou a adxudicación provisional do contrato de redacción do proxecto urbano de reordenación do ámbito definido como “Área Termal Campo da Feira”. Este trámite suporá a definición de usos das dúas áreas de reparto que aquí contempla o PXOM, permitindo o futuro desenvolvemento urbanístico deste chan, de localización estratéxica na cidade e contemplado dentro do Plan Estratéxico Termal de Ourense. |
|