A Consellería de Medio Ambiente, Territorio e Infraestruturas está a analizar a viabilidade de implantar un servizo transfronteirizo de transporte por estrada que conecte as cidades de Verín e Chaves. Trátase dunha experiencia piloto, “que tratará de reforzar as relacións transfronteirizas en corredores con menores volumes de tráfico, facilitando os desprazamentos mediante os servizos públicos”, sinala o departamento de Agustín Hernández.
Os estudos elaborados ata o momento apuntan a que un total de 13.000 persoas empregarían este servizo que estaría operativo 15 horas ao día (de 7 da mañá ata as 22 horas), cunha frecuencia media dunha hora en períodos punta, polo que se realizarían unha media de 10 viaxes (ida e volta) ao día. Este servizo realizarse coa contratación dun minibús.
Segundo a Consellería de Medio Ambiente, Territorio e Infraestructuras, deste xeito darase resposta á potencial demanda dunha liña de transporte que se vén reclamando debido a varias necesidades: a de facilitar a mobilidade das persoas residentes a ambos lados da fronteira e que teñen que realizar este itinerario por motivos de traballo; de compartir equipamentos deportivos, culturais e educativos por colectivos de distintas idades; de potenciar a mobilidade turística; e, por último, de dar resposta ao volume de pasaxeiros que conlevará a futura instalación do hospital comarcal de Verín.
Chaves-Verín, cuarto paso máis activo de todo o Estado
Á espera dos resultados finais que revelen os estudios que se están a desenvolver, a intensidade media diaria entre Chaves e Verín é de 4.000 vehículos, sendo o paso fronteirizo máis activo despois dos grandes itinerarios como Tui-Valença (no Norte), Fuentes de Oroño/Badajoz-Caia (no Centro) e Ayamonte (no Sur).
Sinala a Consellería de Agustín Hernández que, ata o momento, os traballos deste proxecto céntranse no deseño completo de medidas, na memoria técnica e na estimación de ingresos e de custes, que implicará este proxecto. Unha fase de traballo que se prolongará ata finais do mes de outubro.
O seguinte paso, no que se xa se está a traballar, é definir e localizar as diferentes vías de financiamento para a viabilidade deste proxecto. Neste sentido a Consellería adiante que xa ten definidas algunhas posibles fontes de financiamento, como os fondos europeos do programa Interreg (proxectos de apoio a accións transfronteirizas) ou o Programa Marco I+D; ou os recursos do Estado, a través dun contrato programa ordinario do Ministerio de Fomento ou dos fondos da liña de axudas á mobilidade. |
|