A concellería de Cultura do Concello de Ourense informa das actividades previstas para este mes de agosto por parte do Movemento Social Ourensán.
Este colectivo, que agupa a un total de once asociacións e entidades culturais, puxo en marcha dende o pasado mes de xuño o programa Actíva-te no verao co que pretende cubrir a demanda de ocio dos ourensáns dende un punto de vista non mercantilista, afastado do consumo como única forma de entremento, sinala o departamento da nacionalista Isabel Pérez.

En concreto, a oferta cultural do mes de agosto céntrase nas seguintes actividades:

-Durante todo o mes, terá lugar unha exposición titulada “Retratos de sustentabilidade” no centro de Aspanas (Avenida de Portugal, 93) e outra na Casa da Xuventude, que leva o nome de “Os bancos pasan factura”.

-Os días 11 e 12 de agosto, na praza da Madalena de 22:00 a 24:00 horas  realizarase un obradoiro de malabares e percusión con pelotas, aros, mazas, etc.

-No Castro de San Cibrao de Las (O Carballiño) celebrarase  a noite do 13 un visionado de estrelas (das perseidas) ás 21:00 horas.

-Os días 13 e 27 a asociación Sem Um Cam organiza na  súa “Cousateca” (iniciativa para o préstamo das cousas) un obradoiro de costura e reciclaxe, ás 20:00 horas na rúa do Vilar, 9.

-As piscinas de Oira acollen os días 15 e 22 ás 18:30 horas dous obradoiros de reciclaxe para nenos. En concreto, o día 15 estará dedicado á construcción de bonsais e o día 22 de marionetas.

-Os días 18, 19 e 20 na praza de San Marcial de 21:00 a 23:00 horas terá lugar a captura colectiva de vídeo e audio con software libre. Os interesados deben inscribirse en activatenoverao@saramaganta.info, e levar a súa cámara o día da actividade.

-Un cantautor cómico actuará o día 24 na praza de San Marcial ás 22:00 horas. Ademais, o público asistente poderá participar na función.

-A música na rúa celebrará tres espectáculos os días 25, 26  e 27 na praza da Imprenta de 22:00 a 24:00 horas. O primeiro deles denomínase “Animais domésticos”, o segundo “Ergom” e o terceiro “Marea negra”.

-O colectivo Masa Crítica presentará o día 27 no parque de San Lázaro ás 20:00 horas a “Bicifestación Flash Mob”.

-Por último, o día 28 na praza de San Marcial ás 20:00 horas terá lugar un obradoiro de graffiti.

As asociacións promotoras deste proxecto de ocio cultural son Rede galega anticapitalista (Ra!), aMaRantE, Cineclube Padre Feijoó, Semente, A Esmorga, Casa da Xuventude de Ourense, Verdegaia, Amigos da Terra, Anacos da cidade, Lerchas, Sem Um Cam e a Comisión de Denuncia de Galiza.