O Grupo do BNG de Celanova propón ao Concello e a todos os comerciantes unha solución transitoria que veña a paliar o problema que representa xa en tódalas vilas, ademáis das grandes urbes, o estacionamento de vehículos, e que se agrava no verán, sinala o BNG.
Neste sentido, sinala o BNG que “a Estación de Autobuses de Celanova leva terminada e sen uso vai para 6 anos. Esta infraestrutura é un ben ocioso que tivo un custo no investimento de máis de 300.000 € e supón unha dotación da rede de transportes que nunca foi aberta e empregada para tal fin”.
Os nacionalistas propoñenlle ao alcalde, Antonio Mouriño, que abra o espazo baleiro da explanada da Estación de Autobuses, o que “sería magnificamente acollido e rendibilizado polos usuarios e comerciantes da nosa localidade”, adianta o BNG.

Recordan os nacionalistas que teñen sido moitas as iniciativas formuladas polo Grupo Municipal do BNG sobre a edificación baleira da Estación destinada ao transporte de viaxeiros e mercadorías.
E máis, o BNG de Celanova adianta que levará a situación xurídica  esta infraestrutura á Comisión Europea a través da eurodeputada Ana Miranda integrada no Grupo Europa do Pobos Verdes, “por ter recibido esta edificación unha axuda económica procedente dos Fondos Europeos de Cohesión”.