A deputada do BNG Tereixa Paz emprazou este martes ao presidente da Xunta, Alberto Núñez Feijóo, a que adopte “medidas políticas inmediatas e contundentes” contra o delegado territorial de Ourense que el nomeou, Rogelio Martínez, toda vez que a Audiencia Nacional xa confirmou que está involucrado nun asunto de fraude con cartos públicos.
Tereixa Paz e Alfredo Suárez Canal rexistraron unha batería de iniciativas parlamentares a través das que reclaman do señor Feijóo que dea as explicacións pertinentes e actúe en consecuencia, toda vez que é súa a responsabilidade de nomear a Rogelio Martínez para o máis alto cargo de representación política e institucional na provincia.

Os deputados nacionalistas instan a Núñez Feijóo a que clarifique se unha “persoa involucradada por sentenza xudicial firme de defraudación de fondos públicos pode seguir ocupando o seu cargo de Delegado Territorial”.
Asemade, a través das iniciativas presentadas preguntan se tiña coñecemento, antes do nomeamento, dos procesos nos que estaba implicado Rogelio Martínez e se foi informado dos mesmos polo propio afectado.