Ourense acude este ano á X Mostra de Diversidade Cultural que se celebra na cidade catalana de Terrasa. Nesta ocasión, Ourense representa a Comunidade galega. No stand do Concello, están expostas desde este venres ata o vindeiro domingo, diversas esculturas de catro artistas ourensáns, traxes rexionais en representación da nosa tradición e folclore, material típico do Entroido ou a maqueta do Auditorio, como exemplo dun edificio moderno da cidade.

Trala presencia de máis de 75.000 asistentes na última edición, a Mostra deste ano incluirá, xunto ao stand do Concello de Ourense, a representación de poblacións da xeografía española de puntos tan diversos como Zafra (Extremadura), Alhama de Murcia (Murcia), Arcos de la Fontera (Andalucía) ou Almadén (Castilla la Mancha), aos que hai que engadir stands de Marruecos, Senegal e Latinoamérica.

Na presentación da visita o pasado martes, o alcalde agradeceu aos organizadores da Mostra a "oportunidade única" que supón para a nosa cidade a participación nesta Mostra, xa que "para nós é un excelente escaparate para manifestar e dar a coñecer a nosa magnífica diversidade cultural", sinalou Francisco Rodríguez. Ademais, subliñou a honra que supón representar a nosa Comunidade Autónoma, e manifestou o seu desexo de "atraer visitantes ás nosas terras para coñecelas en primeira persoa".
Pola súa banda, a concelleira de Cultura Isabel Pérez, declarou na presentación que o obxectivo da Mostra é "aproximar o noso entorno ós ourensáns e resto de galegos que habitan en terras catalanas".

Encontro coa Asociación Comerciante Textil

Paralelamente á Mostra, e no propio Municipio de Terrasa, o Director Xeral de Emprego e Promoción Económica, José Ángel Vázquez Barquero mantivo este mércores un encontro coa Asociación Comerciante Textil, na que o Concello entrou a formar parte recentemente, e onde se trataron novos proxectos da Asociación e se programou unha Asamblea Xeral en Macerata (Italia) á que o Concello de Ourense tamén asistirá.