A Deputación de Ourense anuncia actuacións de mellora de infraestructuras na fronteira e no interior desta provincia, que acomete dentro do proxecto "Viarraia", segundo aclara a institución que dirixe José Luis Baltar. Trátase dun proxecto que xa foi presentado e aprobado na primeira convocatoria do Programa Operativo de Cooperación Transfronteriza España-Portugal 2007-2013, que conta con una consignación orzamentaria de 2 millóns de euros.
No caso das actuacións raianas o proxecto foi presentado conxuntamente coas cámaras municipais de Chaves e Montealegre, e comprende actuacións de mellora nas estradas que conectan Oímbra con Videferre e Soutelinho da Raia, así como en Verín a estrada Feces de Cima-Lamadarcos.
Xa no interior da provincia, inclúese nestas actuacións da Deputación de Ourense a mellora da estrada que une A Pobra de Trives con Chandrexa de Queixa, nun traxecto de 20 kilómetros dos cales os 10 primeiros son tamén os de acceso ao Complexo de Montaña de Cabeza de Manzaneda.
No caso das estradas fronteirizas con Portugal, a Deputación subliña que "con estas actuacións preténdese a permeabilidade do espazo fronteirizo, facilitando desta maneira a circulación de persoas e bens entre ambos lados da fronteira".
A institución que dirixe José Luis Baltar recibirá para estas obras exactamente un total de 1.956.666,67 euros, cantidade que nun 75% está cofinanciada polo Fondo Europeo de Desenvolvemento Rexional,FEDER.
"O feito de que a institución provincial consiga que sexan aprobados os seus proxectos demostra a calidade das propostas e iniciativas presentadas pola Deputación e o alto valor que dende a Union Europea hai sobre o traballo desenvolvido pola institución", sinálase dende esta Deputación ourensá.
|