Con motivo da celebración do Día Internacional da Muller, a Concellería de Educación do Concello de Ourense proxecta este xoves no Centro Cultural da Deputación, o documental "La Rosa del Desierto", dirixido por Tomás Martínez. Na actividade, enmarcada dentro do programa educativo “Teatro, Cine e Danza na Escola”, participarán un total de 300 alumnos de 3º e 4º da ESO de seis centros de ensino da cidade (IES Blanco Amor, IES 12 de Outubro, IES Portovello, IES Otero Pedrayo e C. A Purísima).
Os obxectivos da iniciativa son coñecer a situación actual do pobo saharaui e o papel que desenvolven as súas mulleres, ademais de favorecer o diálogo e a sensibilización social.
O documental, a través da imaxe e testemuñas das mulleres saharauis, introduce ó espectador na situación e nas condicións de vida que ten que atravesar o pobo saharaui dende que, en 1975, o Sáhara Occidental fora ocupado por Marruecos e miles de familias se viron na obriga de fuxir e buscar refuxio en territorio arxelino. As mulleres saharauis que permanecen exiliadas dende 1975 nos campamentos refuxiados foron as artífices dunha auténtica revolución en todos os ámbitos da sociedade do Sáhara. Fixeron a miragre de conseguir rexurdir a vida dun pobo desolado, no medio dun deserto hostil e pedregoso.
As proxeccións irán acompañadas de mesas redondas, nas que participarán persoas relacionadas co tema do Sáhara e a muller.
Así, na primeira sesión, ás 10:00 h., asistirá Tomás Martínez, director do documental, Raquel Casares, membro do Ilustre Colexio de Avogados de Ourense) e Clara Moure, traballadora da Concellería de Benestar Social.
Na segunda sesión, ás 12:00 h., repetirá presencia o director Tomás Martínez, que será acompañado de Pilar López, Vicedecana do Ilustre Colexio de Avogados de Ourense. |
|