Deputación de Ourense e "Down Ourense" renovaron este xoves a colaboración que a institución provincial ourensá lle ven prestando a esta Asociación desde o ano 2005. De tal xeito que, destacou a súa presidenta, María del Carmen Vila, "a Deputación é o organismo que máis nos ten axudado".
O novo convenio asinado este xoves vai dirixido ao programa "Emprego con Apoio", cuxa finalidade é integrar no mercado ordinario de traballo a persoas coeste síndrome.
A sinatura deste convenio concrétase coa incoporración laboral dunha persoa con síndrome de down, que desenvolve o seu labor no Centro Cultural da Deputación dende o día 1 deste mes.

O Presidente da Deputación apostou polo compromiso da Deputación "na busca de igualdade de oportunidades", e incidíu en que a Deputación foi a primeira institución pública en implicarse neste proxecto.
Tamén anunciou a posta en marcha dun novo programa de adestramento prelaboral, con financiamento do Fondo Social Europeo, para desenvolver en colaboración con Down Ourense, organización da que valorou todo o esforzo que realiza.

A persoa con síndrome de down que se incorporou laboralmente á Deputación no seu Centro Cultural ven desenvolvendo labores de portería, xestión da correspondencia con distintos servizos da institución e atención das salas de exposicións, entre outros encargos.