"Tivemos que facer un esforzo de programación para poder achegar estas actividades a todos os pobos que o demandan, pero a participación é moi satisfactoria, contribúe a finalidade de achegar ós pobos accións que aumenten a calidade de vida dos nosos maiores, de xeito que vivir no rural non impida realizar actividades que favorecen a autonomía persoal e as relacións sociais, obxectivo do Programa".
Así explica a concelleira de Servizos Sociais e tenente de alcalde do Concello de Maceda, a socialista Ana María Rodríguez, o "esforzo" que sinala ven de acometer este Concello para organizar unha serie de actividades para persoas maiores en oito localidades de Maceda.
En tres pobos, Castro de Escuadro, Santiso e Carguizoi, 40 persoas maiores comezan na primeira semana de febreiro un taller de Memoria impartidos pola Psicóloga do CIM e a Educadora Social do Concello.
Noutros cinco, Casetas do Rodicio, Xinzo, Tioira, Foncuberta e Pías, outras 60 persoas maiores realizan actividades de psicomotricidade favorecedoras da coordenación e relaxación dinamizadas pola Educadora Social do Concello.
Asemesmo na vila, no Edificio Multiusos, comezará un Taller de Memoria impartido pola Psicóloga do CIM, sinala a concelleira.
As actividades desenvólvense semanalmente de once a doce e media da mañá.
Ademáis, este mesmo luns, día 26, remata o Taller de Memoria en Pías, o 28 en Tioira e o 30 en Foncuberta, talleres desenvolvidos ao longo dese pasado cuatrimestre.
|