“Dalle forma ós teus contos” consiste fundamentalmente na realización de libros escritos e ilustrados por parte dos rapaces a partir da visita dunha especialista que motivará ós alumnos co libro de arte, pois o tema globalizador da campaña de Animación á Lectura deste ano é “Literatura e arte”. A actividade consta de tres fases:

- Motivación: unha especialista realizará a motivación directamente na aula, empregando un conto sobre arte para contárllelo ós rapaces.
- Realización: proposta de libro-forma, para que o profesorado o realice cos seus alumnos.
- Exposición: os libros realizados exporanse na XX Exposición de literatura infantil que organizará o Concello, no mes de Maio.

Uns 90 alumnos do CEIP Irmáns Villar dan comezo a esta actividade, na que logo tomarán parte máis de 600 rapaces doutros 10 centros da cidade.