O delegado da Consellería de Vivenda e Solo, Antucho Espinosa, mantivo este luns un encontro informativo cos veciños de Verín para explicarlles as actuacións previstas no Concello a través do Plan Sectorial de Vivenda, que inclúe unha bolsa de solo denominada Fontenova.
No encontro, o representante do departamento de Teresa Taboas aclaroulle aos veciños que o obxectivo é adquirir a totalidade dos 85.130 metros cadrados da Fontenova por mutuo acordo cos propietarios, ben a través da compra directa dos terreos ou ben a través de permutas de solo rústico por solo urbanizado, que tería como destino a construción de vivenda protexida ou de vivenda libre a prezo taxado. O Departamento autonómico tamén aclarou aos veciños que ningunha vivenda se vai ver afectada por un proceso de expropiación no desenvolvemento do plan sectorial.

O delegado provincial, Antucho Espinosa, e o coordinador da equipa redactora do Plan Sectorial de Vivenda, Xabier Rivas, tamén se reuniron co alcalde de Verín, Juan Manuel Jiménez. Nese sentido, a Consellería destaca o clima de colaboración amosado polo Concello, que incluso está a analizar unha segunda proposta de localización de solo que se sumaría ao Plan Sectorial de Vivenda.

308 vivendas protexidas

A Consellería de Vivenda e Solo de Teresa Táboas recalca que prevé construir 308 vivendas protexidas e de prezo limitado e un investimento público e privado de 8,9 millóns de euros no Concello de Verín a través do Plan Sectorial de Vivenda.
En concreto, o Plan Sectorial recolle unha bolsa de solo denominada Fontenova, cunha superficie total de 85.130 metros cadrados que albergará 308 vivendas protexidas. Desa superficie, 24.000 metros cadrados quedan reservados para zonas verdes, 9.500 metros cadrados para equipamentos e se crean 255 prazas de garaxe.

O investimento público e privado previsto nesta actuación é de 8,9 millóns de euros entre 2009-2017, o que supón unha oportunidade para o conxunto do Concello que disporá de vivendas de calidade a prezo accesible que ofertar aos residentes e implicará tamén a xeración de actividade económica e de emprego.