O grupo nacionalista no Concello de Ourense considera que "o procedemento seguido para adxudicar o servizo de información turística e comercial foi escrupuloso e que tan só buscou favorecer o interese da cidadanía e o servizo público", sinálase nunha nota informativa emitida este martes para atallar as críticas e insinuacións do Partido Popular ao respecto. "Existe un expediente completo elaborado polos técnicos municipais, e a concellería de Comercio e Turismo optou pola mellor das ofertas presentadas, a que supuña un custe cero para o Concello", engade ao respecto o tenente de alcalde, Alex Sánchez Vidal.
Aínda así, o Grupo do BNG anuncia que someterá a concurso público a adxudicación das polémicas pantallas informativas do Concello de Ourense.
Con todo, Tenencia de Alcaldía recórdalle ao PP que "non pediu ningún tipo de oferta e optou pola adxudicación directa" no caso dos catro reloxos termómetro que existen na cidade ou na adxudicación das cabinas telefónicas. E que mesmo seguiu o procedemento de renovación directa da concesión dos reloxos termómetro no ano 2003.
Sinala a Tenencia de Alcaldía que en todos estes casos as licencias de instalación baseánse no artigo 77 do Reglamento de Bens de Entidades Locais, que nos seus puntos 1 e 2 din textualmente que "o uso común especial normal dos bens de dominio público suxeitarase a licenza, axustada á natureza do dominio, aos actos da súa afectación e a apertura do uso público". No punto 2, sigue sinalándo a Tenencia de Alcaldía, establécese que "as licencias otorgaranse directamente, agás se por calquera circustancia se limitara o número das mesmas, en cuxo caso o será por licitación e, se non fose posible, porque todos os autorizados tivesen que reunir as mesmas condicións, mediante sorteo".
No caso das pantallas publicitarias a súa colocación non tiña carácter de exclusividade "dado que no futuro, co medre da cidade, o Concello podería considerar maiores necesidades informativas e dar paso a novas empresas e novas ofertas", concreta Sánchez Vidal.
WIFI nun radio dun quilómetro de cada pantalla
Por último, sinala a Tenencia de Alcaldía que noutros concellos, como en Vigo, Santiago, Sevilla ou o Carballiño, con gobernos do PSOE, foron adxudicados de xeito directo e sen procedemento pantallas publicitarias de semellantes características, tan só coa licencia de instalación.
"É máis, no caso de Vigo a colocación destas pantallas non tivo ningunha contraprestación para o Concello. No caso de Ourense existía un expediente administrativo e seguiuse o modelo de concurso negociado", sinala Sánchez Vidal.
Despois dunha serie de puntualización referentes a legalidade do proceso e dos pasos dados ao respecto pola Tenencia de Alcaldía, conclúese sinalando que "a oferta da empresa que foi a Xunta de Goberno era beneficiosa para os cidadáns, xa que ademais de ofertarlle un servizo de información municipal, tamén terían alí cabida as informacións das distintas asociacións de veciños, culturais e sociais de Ourense."
Segundo Sánchez Vidal, a empresa ofertaba tamén como mellora da su proposta un servizo de conexión a internet gratuíto para os ourensáns nun radio dun quilómetro de cada pantalla a través do sistema WIFI. A cambio, o Concello permitía que a empresa utilizase o 50% do tempo de emisión das pantallas para explotación comercial como método para rendabilizar e sufragar o servizo público. |
|