A deputada do BNG no Congreso, Olaia Fernández Davila, ven de presentar no Congreso unha proposición non de lei na que insta ao Goberno a paralizar a concesión de novos aproveitamentos hidroeléctricos no Miño-Sil. Davila tamén demanda ao Executivo que realice os estudos pertinentes que permitan avaliar o impacto medioambiental e social dos encoros e minicentrais existentes na actualidade na conca do Miño-Sil. Nun terceiro punto, a deputada nacionalista empraza ao Goberno a iniciar os expedentes de caducidade sobre as concesións de aproveitamentos hidroeléctrico.
Na súa iniciativa parlamentar, a deputada do BNG pón de manifesto "a elevada presión que soporta a conca hidrográfica do Miño-Sil, na que están ubicadas 77 centrais hidroeléctricas, máis do 80% delas en territorio galego".
Olaia Fernández Davila salienta que "a este feito hai que sumar os proxectos de encoros que se atopan en fases de tramitación e cuxa autorización é responsabilidade final do Ministerio de Medio Ambiente, Medio Rural e Mariño".
Neste sentido, alude aos 20 proxectos de aproveitamentos hidroeléctricos con concesión firme e sen proxecto constructivo, e ás 44 solicitudes que se atopan en fase de tramitación.
A deputada nacionalista subliña ao Goberno que debe ter en conta que se trata dunha conca moi castigada polo importante número de encoros que ten, "por iso é de máxima necesidade que se paren este tipo de construccións", conclúe a exposición da parlamentar do BNG. |