Esta actuación estrutural suporá un investimento de 16 millóns de euros. O alcalde de Ourense, Francisco Rodríguez, asinará o próximo 7 de outubro un convenio co ente xestor do Ministerio de Medio Ambiente, Acuanorte, para a redación do proxecto construtivo que sinale tódalas actuacións necesarias para este fin.
Así, no texto do convenio para o proxecto construtivo de "Abastecemento de auga a Ourense", o documento recoñece que actualmente "a poboación situada na marxe dereita do Miño non dispón das garantías de cantidade de recurso necesarias" , xa que o ramal que parte o anel principal de reparto do sistema de abastecemento da cidade e cruza o Miño "carece de capacidade suficiente para subministrar as pautas diarias producidas durante os meses de verán, cando as demandas son maiores polas altas temperaturas e baixas precipitacións".
Asimesmo, o documento sinala que "a capacidade da Estación de Bombeo de Chapa, encargada de impulsar a auga ata as zonas de maior cota, e ós tres principais depósitos que regulan a subministración desta área da cidade (Chapa, Eiroás e Madrosende) son insuficientes, xerando situacións de precariedade que poñen en perigo o abastecemento nos momentos de maior demanda".
Finalmente, o proxecto construtivo do novo abastecemento, que terá 700.000 euros de presuposto e que suporá a inversión de 16 millóns de euros para a súa execución material, terá como obxectivo paliar o déficit que lastra o crecemento de cinco zonas contempladas no PXOM redactado polo anterior equipo de Goberno, pero que non contan co necesario caudal.
Trátase da zona da ladeira do Montealegre, cunha poboación potencial de 15.000 persoas, no que “o sistema de distribución actual non conta con capacidade para afrontar o forte crecemento previsto nesta zona da cidade”.
O prazo para a redación destes traballos rematará en maio de 2009.
|