A Consellería remitiu este mércores o convenio asinado á tenencia de alcaldía do Concello de Ourense para a rehabilitación do conxunto de fachadas traseiras dos nº 24, 26, 28, 30, 32, 34, 36, 38 e 40 da rúa Pena Trevinca. Tal e como se recolle no texto, do orzamento total previsto para acometer as obras - 212.650 euros – a Consellería aportará 170.119 euros, o 80% do total. Pola súa banda, o Concello de Ourense será o encargado de levar a cabo tódalas actuacións relativas á contratación das obras proxectadas, así como as relativas á obtención dos permisos e das autorizacións que sexan necesarias.
As obras consistirán fundamentalmente na supresión ou reorganización de elementos superpostos á fachada, dándolles un tratamento conxunto de orde e deseño. Así, eliminaranse os tendais, pintaranse as reixas, as saídas de gases mudaranse por outras novas segundo o deseño, os aparatos de aire acondicionado taparanse con caixóns de chapa perforada, as baixantes descorrerán polo exterior das vivendas, e os canalóns serán substituídos por outros novos de zinc.
Tamén se realizará unha actuación de mellora e acondicionamento no pasadizo da rúa Coenga-Rúa Pena Trevinca, e se fará un tratamento de cor das fachadas, por considerarse axeitada unha variación de cor que xerará unha nova harmonía no conxunto do espazo.
|