O plan chámase “Impulso Vitivinícola do Ribeiro”, e abrangue puntos estratéxicos de infraestruturas, capital humano, superficie territorial, variedade dos viñedos, promoción da calidade dos viños e modernización das explotacións. Os obxectivos que persegue este plan consisten en dignificar e mellorar a calidade de vida da poboación mediante a dotación de infraestruturas básicas, en impulsar os procesos de concentración da superficie territorial, en fomentar a presenza de variedades nobres e autóctonas nos viñedos, en garantir a revitalización demográfica integral, estimular a produtividade, calidade e innovación modernizando as explotacións vitivinícolas, en avanzar na profesionalización dos recursos humanos que operan no Consello Regulador do Ribeiro e no impulso, promoción e difusión da calidade dos viños do Ribeiro de cara a súa extensión comercial.

En concreto, ao abeiro do Plan de Mellora das Infraestruturas Viarias no Ribeiro, inserido no “Impulso Vitivinícola do Ribeiro”, destinaranse 2.363.503 euros, distribuídos en varias anualidades, para o acondicionamento de 68 camiños nos concellos da Arnoia, Beade, Carballeda de Avia, Castrelo de Miño, Cenlle, Cortegada, Leiro, Ourense, Punxín, Ribadavia e Toén, actuacións correspondentes a aqueles lugares que presentan unha deficiente dotación de infraestruturas rurais no seu territorio que producen carencias importantes que frean o desenvolvemento da zona.

Segundo Medio Rual, "o Plan vai servir para dignificar e mellorar a calidade de vida da poboación mediante a dotación de infraestruturas básicas, para impulsar os procesos de concentración da superficie territorial e para fomentar a presenza de variedades nobres e autóctonas nos viñedos". Ademais, téntase de que logre a revitalización demográfica co fomento do relevo xeracional na actividade produtiva, así como estimular a produtividade, calidade e innovación coa modernización das explotacións vitivinícolas.