Termatalia e o Colexio Oficial de Fisioterapias de Galicia veñen de asinar un convenio de colaboración mutua para potenciar e dar a coñecer as funcións dos Fisioterapeutas nos centros termais, "xa que o traballo deste tipo de profesionais vai máis alá do tratamento de patoloxías reumatolóxicas, traumatolóxicas ou deportivas", sinala a organización de Termatalia.
Deste xeito, todos aqueles que se acheguen ata a oitava edición de Termatalia, que se celebrará en Expourense entre os días 3 e 5 de outubro, poderán recibir unha masaxe completamente gratuíta de mans dun profesional da fisioterapia que, ademais, atenderá as preguntas e consultas que os visitantes queiran formularlle sobre as súas doenzas.
 
A área de masaxes de Termatalia 2008 contará con equipamento e mobiliario de última xeración cedido por Cromo, unha empresa ourensá, ubicada no Polígono de San Cibrao das Viñas, especializada na fabricación e deseño de mobiliario clínico e sanitario.
Cromo será unha máis das empresas provedoras de bens de equipo que expoñerán os seus produtos e servizos na oitava edición da Feira Internacional de Turismo Termal, que está patrocinada pola Dirección Xeral de Turismo da Xunta de Galicia e da que se agarda que sexa visitada por 10.000 persoas.