O ámbito sobre o que se desenvolve este Parque Empresarial sitúase na parroquia de Tamagos, no centro do Concello de Verín e ao sur da autovía das Rías baixas, ocupando as zonas de O Padrón, As Leiras Grandes, O Fachedo, A Viña Grande, o Marco Rachado e A Granxa. Os lindes do Parque Empresarial de Tamagos están definidos ao Norte e ao Leste pola futura Autovía Verín-Fronteira Portuguesa, ao sur pola delimitación do núcleo de Tamagos, e ao Oeste pola N-532.

"A ordenación interior do Parque Empresarial de Tamagos garante a integración do Camiño Portugués de Santiago que atravesa o ámbito de Sur a Norte", segundo sinala o departamento de Teresa Taboas. A ordenación proposta no Proxecto Sectorial respecta a zona do Camiño establecendo unha marxe de protección de aproximadamente 60 metros de ancho. Tamén se integran no ámbito outras preexistencias no ámbito como a zona do Río Adebes perteñecente ao LIC-Río Támega, o xacemento romano do Ladrillal ou a edificación coñecida como a “Casa da Granxiña”, garantindo a súa conservación, protección e mellora.

No que atinxe á accesibilidade ao Parque Empresarial de Tamagos, o Proxecto garante a conexión coa estrutura viaria existente. Nese sentido, o acceso principal será desde a    N-532 mediante un enlace a distinto nivel.

Da superficie total do ámbito, 1.141.456 m2, destinaranse a uso industrial, empresarial e de servizos 583.305 metros cadrados. En concreto, as parcelas destinadas a uso industrial agruparanse nas zonas norte, sur e sureste do parque, configurando no seu entorno espazos libres a modo de barreira para minimizar o seu impacto no entorno.
Por outra banda, as parcelas destinadas a uso terciario -empresarial e de servizos-, agruparanse a ambos lados do viario principal de acceso ao parque empresarial e lonxitudinalmente relacionadas co Camiño Portugués de Santiago.
Ademais, o Proxecto Sectorial do Parque Empresarial de Tamagos contempla unha superficie de 296.767 m2 para espazos libres, 40.731 m2 para equipamentos e servizos urbanos, e 135.251 m2 para o sistema viario e aparcamentos destínanse. O resto da superficie do ámbito complétase coa reserva de 72.252 m2 para a conservación do Camiño Portugués, e 13.150 m2 para a conservación da zona do Río Adebes perteñecente ao LIC-Río Támega.