Tal e como indica no texto da iniciativa o portavoz en materia de novas tecnoloxías, Fernando Blanco, o Plan Técnico Estatal de Televisión Dixital Terrestre fixaba como obxectivo para finais deste ano 2008, que o sinal chegase ao 90% da poboación e, xa en abril de 2010, o 98% no caso de RTVE e o 95% para o resto.
"Mais, recentemente, o director xeral de Comunicación Audiovisual anunciou que o oriente ourensán sería das primeiras zonas de Galiza onde se culmine a transición á TDT, de tal xeito que o apagamento de emisións analóxicas nesta zona está previsto para o 3 de xuño de 2009", sinala o parlamentar nacionalista, que apunta no caso desta iniciativa que existen dificultades no caso galego "xa que, tal e como se ten indicado tamén desde a Secretaría Xeral de Comunicación da Xunta, as porcentaxes de poboación sen cobertura agrávanse por mor da súa dispersión poboacional, a súa orografía, o seu baixo peso relativo no total da poboación estatal e as dificuldades para o desenvolvemento e estabelecemento de infraestruturas de radiodifusión axeitadas", sinala Fernando Blanco.
Xustamente, para combater esta situación, o Real decreto 944/2005 permite aos concellos, en colaboración coas comunidades autónomas, a instalación de estacións de rede de frecuencia única para a difusión da TDT en zonas de baixa densidade de poboación.
Tamén desde a FEGAMP, en xaneiro de 2007, solicitouse que a Secretaría Xeral de Comunicación incluíse nas súas subvencións a instalación e mantemento dos equipos necesarios para receber a TDT.
Agora, Blanco Parga pregunta ao goberno galego cal é a cobertura dos concellos ourensáns e si mantén a previsión de adiantar o apagamento analóxico en xuño do ano vindeiro.
|