O senador nacionalista lembra que no ano 2001 asinouse un Convenio entre a Xunta, o Ministerio de Medio Ambiente-Confederación Hidrográfica do Norte e a Asociación Galega de Pizarristas co obxectivo de desenvolver unha serie de actuacións destinadas a recuperar ambientalmente as zonas de entulleiras de pizarra na Galiza, na provincia de Ourense e Lugo. Entre as medidas a desenvolver se contemplaba a restauración hidrolóxico forestal das marxes dos ríos Casaio, Riodolas, San Xil, Valborrás, río Candís, río Sil, as concas de Cacheira, Seco, Perón e a zona de San Vicente de Leira. Na provincia luguesa, estaría a restauración hidrolóxico forestal das marxes dos ríos Quiroga e Espín.  
Lembra Pérez Bouza que no Protocolo asinado as partes se comprometeron a realizar os trámites necesarios para a execución dos proxectos nun periodo de cinco anos, e o financiamento repartíase do seguinte xeito: 70% do Ministerio de Medio Ambiente, 10% a Xunta e 20% as empresas de pizarra. 

Axilizar os proxectos pendentes  

O senador do BNG amosa a súa preocupación "porque a día de hoxe só se coñece que están asinados os convenios para a execución das obras da primeira fase referentes ás actuacións no Sil e O Castañeiro", sinala Pérez Bouza.
De aí que o senador nacionalista pregunte agora ao Goberno qué actuacións concretas se levaron a cabo e quer saber se estes proxectos “continúan a ter o mesmo interese estratéxico que motivou a sinatura do Protocolo inicial”.  
Ademáis, formula unha serie de preguntas centradas na financiación dos proxectos. “Dado que en grande medida estas actuacións estaban financiadas con fondos FEDER, cal será a orixe do financiamento das actuacións pendentes? Manterá o Goberno o reparto financeiro entre a Administración central e a Xunta?”.