Segundo explicou o vicepresidente da Xunta, esta iniciativa non só se limita a promover este espazo como destino turístico, senón que tamén se presenta como un “polo de desenvolvemento” co que a Xunta de Galicia pretende converter a estes concellos en exemplo de desenvolvemento rural para o país. Tal como apuntou Quintana, xa se ten iniciado un traballo conxunto entre as consellerías de Vivenda e Solo, Medio Rural, Innovación e Industria e Medio Ambiente para que cada departamento, desde a súa perspectiva, dea novos pasos a prol do desenvolvemento integral dos concellos membros da Reserva da Biosfera da área de Allariz.
Co traballo xa iniciado, apóstase por esta iniciativa como motor para o desenvolvemento integral dos concellos do rural nas áreas de vivenda, medio rural, innovación e medio ambiente. Así, Quintana lembrou que é precisamente o medio rural o que ten o parque de vivenda máis abandonado de Europa, polo que as actuacións deste programa encamiñaranse a solventar estas deficiencias. Tamén se referiu ao plan como “unha aposta polo medio rural” e pola súa capacidade produtiva, agraria e gandeira, ao tempo que fixo fincapé na necesidade de promover no marco deste plan proxectos industriais sostibles que xeren riqueza e complementen ao sector primario. Ademais, apuntou que, sendo este espazo Reserva da Biosfera, os concellos deben converterse en “exemplo senlleiro de protección medioambiental”.
Asemade, tal como afirmou o vicepresidente da Xunta, este ambicioso proxecto non pode quedar limitado só aos municipios que forman parte da Reserva da Biosfera, polo que avanzou a intención de que a iniciativa poida tamén aplicarse en concellos limítrofes e en todo o Val do Arnoia, desde Maceda ata A Merca.
|