A Consellería de Medio Ambiente e Desenvolvemento Sostible financiará con 333.474,31 euros a construción dun edificio bioclimático e un aula da natureza no Concello de Amoeiro, grazas a un convenio de colaboración entre que autorizou hoxe o consello da Xunta. 
A Consellería de Medio Ambiente desembolsará para este fin 110.000 euros no presente ano e 223.474,31 en 2009. Desta contía, o edificio acaparará 152.616,54 euros, a aula de comprensión da natureza 57.957,77 euros e o arranxo dos arredores 126.900 euros. 

O inmoble terá usos múltiples e acollerá a aula da natureza, na que haberá unha exposición de carácter permanente e información medioambiental. O espazo servirá tamén para que os escolares do concello realicen prácticas relacionadas con esta materia. 
Ademais, propiciarase a rexeneración ambiental do entorno do edificio, que se emprazará nun espazo natural situado na periferia do concello, pero degradado polo abandono de escombros. Esta actuación paisaxística comprende a creación dunha vía, plantación de céspede e especies autóctonas.  

A Consellería asume, por medio do dito acordo, o custo das obras do edificio, agás o proceso de urbanización, e será o concello quen leve a cabo todas as actuacións da execución das obras. 
Así mesmo, estas actuacións enmárcanse dentro dunha estratexia global de Amoeiro coa intención de sumarse á rede de concellos sostibles.