Para Anxo Quintana esta postura común é clave para un tema de vital importancia dentro da transparencia democrática de todo Estado de dereito, como o é o voto emigrante. Por iso, instou ás tres forzas políticas galegas a defender en Madrid o mesmo que xa se ten aprobado en Galiza. Coa reforma da Lei Electoral o que se pretende é rematar cunha situación que Quintana tachou de “escándalo antidemocrático.  
Segundo explicou Anxo Quintana, "aínda se está a tempo de realizar todos os trámites para reformar a Lei Electoral e acadar así que os emigrantes poidan votar en urnas nas vindeiras eleccións autonómicas".

Isto sería posible sempre que o Goberno do Estado presentase, a máis tardar en setembro, unha proposta de lei para proceder a esta modificación. “Temos tempo de sobra, pero é necesario que o goberno do Estado teña vontade política de facelo. Depende da vontade de Zapatero”, afirmou Anxo Quintana, quen instou ao presidente do Goberno a ter en conta o acordo unánime das forzas políticas de Galiza e comezar así a reforma desta lei.
Neste senso, animou a trasladar o acordo unánime do Parlamento galego a Madrid deixando de lado os cálculos electorais e manifestou o seu convencemento de que se as tres forzas políticas galegas manteñen en Madrid a mesma postura que en Galiza “o señor Zapatero e o seu Goberno terán que levar a cabo a reforma da lei”. 

“Espero que Zapatero actúe dunha vez por todas, que faga caso e que modifique a lei para que os emigrantes galegos poidan votar en urna nas vindeiras eleccións, non facelo sería ir en contra dos galegos e galegas, da vontade de todas as forzas políticas e en contra da transparencia democrática”, aseverou o vicepresidente da Xunta.