A Consellaría do Medio Rural anuncia que asinou un acordo coas organizacións sindicais CIG e UGT sobre as condicións de traballo do persoal laboral pertencente ás categorías de encargados de equipamentos mecánicos, oficiais 1ª condutores e oficiais mecánicos dos Servizos provinciais de Prevención e Defensa contra Incendios Forestais da Xunta.
Este acordo, segundo a Consellería de Medio Rural, "permite manter durante o período de perigo alto un dispositivo de persoal mecánico e de apoio loxístico ás brigadas durante as 24 horas do día, os 7 días á semana, de forma continuada". Con isto, "vaise contribuír a unha mellor atención do servizo de emerxencias contra incendios forestais", sinala o departamento de Suárez Canal.
A prestación de servizos dos encargados de equipamentos mecánicos inclúe, entre outras, a coordinación cos distritos forestais de todas as actividades referentes ao mantemento dos vehículos, a coordinación dos traballos nos talleres e velar polo bo uso, mantemento e funcionamento operativo das instalacións do taller para atender calquera emerxencia ao longo de todo o período de alto risco.
Por parte dos oficiais de 1ª condutores a prestación de servizos inclúe o control e mantemento do almacén provincial e dos almacéns de distrito forestal, a distribución dos EPIs e demais roupa de traballo aos membros das brigadas e distribuír e achegar material de apoio e aprovisionamento aos participantes en labores de extinción de incendios. Os condutores encargaranse tamén da coordinación do parque móbil dos distritos forestais e da montaxe e desmontaxe de equipamentos de comunicación móbiles, entre outros.
Os servizos prestados polo persoal ao que se refire o acordo serán de reparación e mantemento de vehículos como de calquera máquina ou motor adscrito á Consellaría, tanto no taller como fóra del cando se precise, así como a montaxe e desmontaxe de equipamentos de comunicación móbiles.
O período extraordinario de prestación de servizos abranguerá os meses de xullo, agosto e setembro e outro máis, se fose o caso, a determinar pola Dirección Xeral de Montes e Inudstrias Forestais.
A xornada de garda, que se realizará de luns a sábado, consistirá nunha quenda de 24 horas distribuída entre tempos determinados de presenza física e localizable, mentres que os domingos a xornada de garda será unha xornada de 24 horas localizable. Logo da xornada de garda gozarase de 24 horas consecutivas de descanso.
|