A tenencia da alcaldía do concello de Ourense, a través da concellería de Seguridade e Tráfico, anuncia que co fin de mellorar a circulación viaria na cidade vai proceder a acometer varios cambios de dirección en diferentes rúas da cidade. Ademais, procederá a efectuar o repintado do pavimento de varios viais. Todos estes cambios prodúcense a partir dun estudo do departamento de Tráfico e da Policía Local.
A rúa Pena Trevinca gañará un carril en sentido de subida (dirección ao auditorio) e quedará prohibido facer o xiro na baixada para acceder de xeito directo á rúa Monte Medo. As alternativas para acceder a Monte Medo baixando Pena Trevinca (dirección á estación de San Francisco) serán entrar por Emilia Pardo Bazán, rodeando Pena Corneira ou accedendo por Serra de Queixa.
Ademais, a rúa Coto Novelle será de sentido único de subida entrando por Pena Trevinca, e na propia rúa Pena Trevinca habilitarase unha nova zona de carga e descarga entre as rúas Serra de Queixa e Monte Medo, xa que na actualidade os camións de reparto tiñan que situarse en dupla ringleira entorpecendo a circulación.
O departamento de Tráfico da Policía Local confía en que todos estes cambios contribuirán a mellorar a circulación dunha das arterias que máis tránsito soporta de Ourense.
O repintado de Pena Trevinca comezará esta semana e os cambios na circulación poranse en marcha a partir da vindeira. O pintado do asfalto incluirá un pequeno carril de entrada dende a rúa Pena Trevinca para acceder á zona histórica á altura da rúa Pena Corneira.
Cambios en Río Arenteiro
Ademais dos sinalados cambios no centro da cidade, outra das zonas nas que se producirán modificacións no sentido de circulación será a Ponte, á altura da rúa Río Arenteiro. O tramo comprendido entre a avenida de Santiago e Río Támega será de sentido único en dirección a Río Sil.
O cambio débese a que até agora o duplo sentido dificultaba a circulación e impedía aparcar na propia rúa. Con esta decisión conseguiranse dez prazas de aparcamento en superficie e ademais mellorarase o tránsito nunha das arterias principais da Ponte como é a Avenida de Santiago.
A modificación está ademais xustificada xa que a rúa paralela a Río Arenteiro, que é a de Río Bibei vai en sentido contrario en dirección á avenida de Santiago, mentres que río Arenteiro quedaría dirección a río Sil.
|