O Xulgado do Social nº 1 de Ferrol establece que a discriminación sufrida por estes traballadores, que por non adherirse a ese acordo foron chamados a traballar 43 días máis tarde que o persoal adherido, constitúe unha violación do artigo 14 da Constitución, que consagra como dereito fundamental de todos os españois a igualdade ante a lei, sen que poida prevalecer discriminación algunha por razón de nacemento, raza, sexo, relixión, opinión ou calquera outra condición ou circunstancia persoal ou social.
Na Sentencia, o Xulgado do Social nº 1 de Ferrol advírtelle así mesmo á Consellería do Medio Rural, que o chamamento do persoal fixo descontinuo non pode quedar ao arbitrio da aceptación ou non de un acordo, senón que debe ser conforme ao ciclo descontinuo no que as necesidades da súa contratación así o esixa, de xeito que, si esas necesidades esixiron para uns o seu chamamento o día 5 de febreiro de 2007, non pode considerarse que polo mero feito de non subscribir un acordo, estes traballadores teñan que ser chamados nunha data distinta.
Por todo iso, o Xulgado do Social nº 1 de Ferrol declara o dereito dos traballadores ao reinicio da súa actividade laboral con efectos de 5 de febreiro de 2007, e non dende o 20 de marzo, coas consecuencias legais e económicas inherentes a tal declaración, que engloban o pago de salarios, cotizacións á Seguridade Social e antigüidade na empresa, polo menos.
Coñecida esta nova sentencia, dende Comisións Obreiras vólvese a falar de "obcecación a conducta ilegal da Consellería do Medio Rural", ao tempo que o sindicato lamenta que "se estén a empregar os cartos de todos os galegos e galegas en dilatar indebidamente a reparación e recoñecemento dos danos causados aos traballadores fixos descontinuos do SPDCIF". |
|