"O complexo continuou a liña de traballo dos dous anos anteriores nos que se rebaixou significativamente a lista de espera cirúrxica, que continúa nunha excelente tendencia a baixa, polo que os seus esforzos centráronse neste en dar un pulo definitivo a redución da demora para primeiras consultas". Así se expresan os responsábeis sanitarios do Complexo Hospitalario de Ourense ao facer balance do ano que rematou, 2007, e fixar as prioridades de cara ao 2008.
Sinalan que a situación de satisfacción en xeral que lles produce a "conta de resultados", está referendada polo feito de que "os datos acadados a fin de ano sitúan ao hospital ourensán á cabeza dos centros hospitalarios de Galicia e son homologables aos dos centros con mellores resultados asistenciais a nivel estatal". E xunto a isto, "os controis de calidade realizados periodicamente demostraron unha mellora na calidade dos coidados de Enfermaría ofertados aos pacientes nestes dous últimos anos".
Entre os principais logros no eido asistencial e de xestión do ano que remata, destacan os responsábeis do SERGAS en Ourense a apertura do novo edificio cirúrxico e as ampliacións do Xeral, a redución da espera para consultas, os novos equipamentos tecnolóxicos e técnicas, e a apertura de novas unidades de hospitalización, como as salas de prealta, tránsito e ingreso polivalente co necesario incremento de persoal de enfermería para elo, tentando evitar a permanencia na área de urxencias dos pacientes aos que se lles prescribe o ingreso, mellorando ademais a súa confortabilidade e a dos seus familiares. "Todo elo, xunto a potenciación da Hospitalización a Domicilio, supuxo un gran esforzo para avanzar na humanización da hospitalización no CHOU", sinalan dende o SERGAS.
Modernizar e ampliar o hospital no 2008
A Revisión do Plan Funcional e do Esquema Director do CHOU, "nado para superar a situación de parálise xerada pola problemática dos terreos necesarios para as novas construcións", terá un especial protagonismo no 2008 e resulta ser un dos principais obxectivos dos responsábeis do CHOU para este novo ano.
O SERGAS tamén confía que no ano recentemente estreado se dará cumprimento a algunhas das demandas históricas dos ourensáns, coa posta en marcha dunha sala de hemodinámica, para diagnóstico e tratamento cardiolóxico, e da atención integral oncolóxica con dous aceleradores nucleares para tratamento radioterápico, que evitarán o traslado de pacientes fora da provincia.
Outro dos grandes obxectivos para o ano entrante é a consolidación e mellora das listas de espera cirúrxica e de consultas. Destacando como obxectivo prioritario neste eido a diminución dos tempos de espera para a realización probas diagnósticas.
Asemade, procederase a unificación e/ou ampliación das áreas de consultas e/ou gabinetes de Traumatoloxía, Cardioloxía, Dixestivo, Neumoloxía, Hematoloxía, Anestesia, Clínica da Dor, Oftalmoloxía e Xinecoloxía. Acollendo, este último servizo, un plan piloto a nivel autonómico para a oferta de parto natural. |