As comarcas ourensás de O Ribeiro, Caldelas, Celanova, y Verín son zonas de Especial Interese Agrario, ZEIA. As catro comarcas ourensás forman parte dun "paquete" de 16 declaradas como tales por acordo do Consello da Xunta de Galicia. A Xunta sinala ao respecto que, con este decreto, "continúa a declaración de Zonas de Especial Interese Agrario co obxectivo de acadar de xeito progresivo a práctica totalidade da superficie agraria do territorio galego", e que entre os factores que se tiveron en conta para a determinación destas novas ZEIA, "figuran a presenza dun número significativo de explotacións, as características e potencialidade dos terreos ou zonas nas que se enclavan, a existencia de zonas que teñen sido obxecto de concentración parcelaria ou que poderán selo no futuro, así como a incidencia da actividade agropecuaria reflexada no número de explotacións, plans de mellora e incorporación de mozos e mozas á actividade agraria".

A declaración afecta a un total de 32 concellos dos 92 da provincia, 10 no Ribeiro, outros tantos das Terras de Celanova, 4 en Caldelas e 8 en Verín. A declaración da comarca de O Ribeiro inclúe aos concellos de Arnoia, Avión, Beade, Carballeda de Avia, Castrelo de Miño, Cenlle, Cortegada, Leiro, Melón e Ribadavia. No caso de Celanova, os concellos aos que afecta a declaración son os de A Bola, Cartelle, Celanova, Gomesende, A Merca, Padrenda, Pontedeva, Quintela de Leirado, Ramirás e Verea.  A declaración afecta aos concellos de Castro Caldelas, Motederramo, Parada de Sil e A Teixeira, que conforman a comarca de Caldelas. E, por último, son Zona de Especial Interese Agrario os concellos de Castrelo do Val, Cualedro, Laza, Monterrei, Oimbra, Riós, Verín e Vilardevós que conforman o territorio comarcal de Verín.

Con esta declaración, segundo Medio Rural "a ampliación da base territorial das explotacións permitirá unha menor dependencia de pastos e forraxes externos, así como a posible diversificación de cultivos, aumentando a capacidade produtiva das explotacións e a posibilidade de apertura a novos mercados para a comercialización dos produtos agrarios".
Medio Rural da Xunta de Galicia prevé que as actuacións a desenrolar nos concellos destas zonas ZEIA,  "redunden nunha elevación do nivel de vida dos agricultores, abrindo e facendo atractiva a actividade agraria a novos sectores de poboación para o seu asentamento no rural, superando así o envellecemento e o abandono do agro galego", subliña o departamento de Alfredo Suárez Canal.