"Castrelo de Miño consolídase como a sede ideal para organizar eventos e competicións deportivas", sinala o Goberno municipal que dirixe como alcalde o nacionalista Xurxo Rodríguez Méndez.
Explícase agora que, "tras anos de promoción, de dar a coñecer a ubicación e as potencialidades do noso concello, e de realizar melloras nas instalacións do Parque Náutico, o Concello de Castrelo de Miño comeza a recoller os frotios deste intenso traballo".

Materialízanse eses "froitos" en 9 eventos que están programados noutros tantos 9 fins de semana consecutivos, a partires deste pasado 28 de abril no que se acadaron máis de 3.000 barquiñas de papel no acto reivindicativo pero tamén lúdico-festivo a prol dunha educación pública.
Ao tempo que se considera dende o Concello, que a feira de cada último domingo de mes "xa é un evento consolidado ao que asisten máis de 100 postos de comerciantes con todo tipo de produtos".

O Concello de Castrelo fai reconto da actividade prevista para as vindeiras fins de semana, e lembra que este domingo, día 5, terá lugar a Transgalaica 2013, proba de BTT Marathon, a que seguira o vindeiro domingo, día 12, o Aviaman 2013, catalogada como "a mellor proba de triatlón de toda a provincia de Ourense".
A Andaina Solidaria, o 17 de maio; a Copa Ibérica de Remo Olímpico dos días 7, 8 e 9 de xuño; o paso do Rallie de Ourense o día 15 de xuño, e o Campionato de Ciclismo da Península Ibérica 2013, son eventos que para o Goberno municipal de Castrelo de Miño supoñen unha posta en valor das potencialidades deste concello.