En Ribadavia, a eurodiputada do BNG Ana Miranda desenvolveu esta fin de semana unha xornada de traballo, que comezou polo Consello Regulador de Denominación de Orixe Ribeiro, onde deu conta do seu traballo no Grupo de alto nivel do viño do Parlamento Europeo de cara a que a recentemente aprobada política agraria común europea (PAC) recollera a continuidade dos dereitos de plantación ate o 2030, frente á liberalización de prantacións en 2018 que se pretendía levar a cabo dende a Comisión Europea baixo a presión dos grandes grupos multinacionais de bebidas.
Ana Miranda informou doutros aspectos positivos incluídos na PAC para o sector do viño, como as axudas directas á protección medioambiental no cultivo das viñas, ou o incremento de axudas á comercialización e internacionalización do viño.

Con todo, Miranda alertou de aspectos que se atopan sen definir e nos que o sector do viño galego vai ter moito en xogo.
Defendeu que "a estrutura de pequena propiedade galega merece un trato diferente ao das grandes superficies de viñedo" de cara ao novo marco europeo de axudas.
De feito en anteriores reformas da PAC o sector galego do viño recibiu só un 1% dos fondos que a UE achegou ao conxunto do sector do viño no Estado Español, sinalou a eurodiputada do BNG, mentres que as Denominacións de Orixe galegas achegan case un 10% do valor dos viños de calidade no Estado. Polo que anunciou que "imos pedir os informes económicos das axudas que dende Europa se deron ao Estado Español en anteriores PAC", para establecer de cara ao vindeiro período de axudas un esquema "territorializado" que faga posible que o viño galego perciba o apoio que lle corresponde.    

Atendendo as demandas prantexadas dende o sector o BNG vai demandar que a Consellería do Medio Rural abandoe a súa deixadez na información ao sector vitivinícola de todo o relativo á nova PAC, así como a parálise de medidas demandadas coma as concentracións parcelarias voluntarias (como a desenvolvida nas Bouzas de Castrelo de Miño) ou os contratos homologados para a produción de uva.

No transcurso da visita ao Ribeiro, Ana Miranda mantivo tamén un encontro con afectados polas preferentes e as subordinadas das caixagas galegas, no que lles informou do seu traballo na comisión de peticións do Parlamento Europeo. Sinalou que, froito das súas conversas co comisario europeo Joaquín Almunia, a eurodeputada do BNG puido saber que dende o goberno español do PP se viñera informando á Comisión Europea de que os aforradores que subscribiran as participacións preferentes eran "inversionistas", o cal condicionara as cláusulas do rescate bancario negociado entre a UE e o goberno español.