Máis de 300 gaiteiros e cantareiras daranse cita na III Xuntanza Provincial de Bandas de Gaitas que organiza e coordina a Escola Provincial de Gaitas da Deputación de Ourense xunto co Concello de Ribadavia, que terá lugar o este 4 de maio en Ribadavia, na xornada de peche da L Feira do Viño que acolle a capital do Ribeiro no primeiro fin de semana do vindeiro mes.

Esta "cita coa tradición, coa etnografía e coa música do instrumento senlleiro de Galicia", como a cualificou Xosé Lois Foxo, director da Escola Provincial de Gaitas e da Real Banda, xuntará a 14 agrupacións de gaiteiros e cantareiras, o que xunto á homenaxe que se lle tributará ao Gaiteiro de Francelos, Paulino Rodríguez Cuíña, "amosa o pulo que se merecen as nosas tradicións e a nosa música, algo que temos a obriga de protexer, conservar e potenciar", afirmou o vicepresidente da Deputación de Ourense, Rosendo Fernández, no acto de presentación do evento, que tivo lugar no Pazo Provincial.
No acto participou tamén o asesor de Cultura da Deputación de Ourense, César Fernández, e o concelleiro de Cultura do Concello de Ribadavia, José Prieto.

O programa de actos comezará o día 4 de maio cun desfile das agrupacións participantes na xuntanza ata a Praza Maior, onde terá lugar as actuacións.